Шахта тіректерін дайындауда жеңіл фибробетонды қолдану

Аңдатпа

Мақалада шахта тіректерін дайындау материалы ретінде фиброкерамзитобетонды қолдану мүмкіндігі қарастырылады. Тақырыптың өзектілігі жер астындағы тау-кен қазбаларындағы тіректердің беріктігін, жарықшаға төзімділігін және ұзақ мерзімділігін арттыру қажеттілігімен айқындалады. Зерттеудің мақсаты – дисперсті арматураланған кеуекті толтырғыш негізінде шахталық жағдайда жұмыс істеуге қолайлы оңтайлы физика-механикалық сипаттамалары бар жеңіл бетон әзірлеу. Жұмыста дәстүрлі және жеңіл бетон қоспаларының салыстырмалы талдауы жүргізіліп, толтырғыш ретінде керамзитті және иілу кезіндегі созылу беріктігін арттыру үшін фиброталшықтарды таңдаудың негіздемесі берілген. Әдістеме әртүрлі құрамдардың беріктігіне, тығыздығына және су сіңіргіштігіне жүргізілген зертханалық сынақтарды қамтиды. Негізгі нәтижелер фибра енгізу арқылы тіректердің жарықшаға төзімділігі мен беріктігін құрылым салмағын арттырмай едәуір жоғарылатуға болатынын көрсетті. Зерттеу нәтижелері шахталық жағдайларда тиімді және үнемді тіректерді қамтамасыз ету үшін фиброкерамзитобетонды қолданудың орынды екенін растады. Жұмыстың практикалық маңыздылығы – алынған құрамдарды тау-кен өнеркәсібіндегі құрылыс процесіне енгізу арқылы құрылымдардың қызмет ету мерзімін ұзарту және жұмыстардың қауіпсіздігін арттыру мүмкіндігі болып табылады.